ورث اجْدَادِي
***** 

يا الغالَطْ ، في وَحْدَة بـْــلادي 

:اسْمعني 

بعـدْ تَقديري واحْتـِرَامِي

لِيكْ نحكي علَى وَرثْ اجْدَادي

للتّاريخ سَجّل ،ودَوّنْ كـلاَمي

لااتْكُونْ غَالَطْ ،في وَحْدَة بـلادي

واتْمعن ياسيدي،ومَتّعْ النّظـَارْ

من شَمالْ طَنْجة حتى لَكْويـرَة

هَذِي  أَرْضِي،ومَافيها أسـْـرَار

كُلشي وَاضحْ،والدّلِيلْ المَسِيرَة

امْشيناها بنِظَامْ،ورَاسْنَا مَرْفُوع

مَسيرَة سِلْمِيَّة شِعَارْها القُـرْآن

بِصَفْ وَاحَـدْ مِنْ كُلْ الرُّبـُوعْ

ابْهَرْنَا العَالَمْ ،بحُسْن الإتْقـَان

*****

وياالغالط في وحدة بــلادي 

اسْألْ الوَاحَة وعرُوشْ النَّخْلَـة

على العَهدْ لَقْدِيمْ تَحْكِي بالتَّدْقِيق

اسْـألْ كُلْ حَبّة تَجْرِي فَالرَّمْلَة

 تَلْقَى لجـواب :

أنا مغربية صَحراوية بلاَتَحْقِيق

*****

ويا الغالَطْ ،فـي وَحْدَة بــلادي

هِيَّ وَحْدَةْ أرضـي مافيها نِقَـاش

عْلِيهَا مَانَتْخَلَّى مَنْقُوشَة فَالقَلب

لَمْسَاوْمَه عْلِيهَا مَاكَايَن عْلاَش

هِيَّ قَضِيَّةْ مَلِكْ،وعَـزِيمَةْ شَعب

*****

يا الغَالَطْ ، فـي وَحْدَة بــــلادي

واسْمَعْنِي واصْغَى لِيَّ مزْيَـان

كُلْشِي بَايَنْ بالصِّدقْ والإمْعَان

اصْدَرْالحُكمْ،وكَانْ اللّي كَـان

حَقّْنـَا هَذا مَشْرُوعْ وبالبَيَـان

*****

:بقلم

عائشة رشدي أويس

إسبانيا